كان ماكان وكان

كان ماكان وكان
كان اليوم ياهو الهم
وكان البكره ياهو النم
وكان الأمس ياهو الامس
وكان ماكان وكان
كان الفرح الزغرد في العين بي طلة حب من داخل بسمة
كان الوجع الصارخ في عين زمنا أسيادو طوالح
كان الفجر الطالع يصهر منك وجع الليل
وكان الليل مرات مرات بيناتنا يغنّي
وكنّا نمنّي
وكنّا نغنّي
وكنّا وكنّا
وكان اللون ياهو اللون
وكان الحلم نفس الحلم
كنا اتنين عاشقين يادوب
وكنا نشاطر اللقمه حلال
وكنا نشارك الفرحه زلال
وكنّا وكنّا وياما كنّا
يا المبديه فيك فرحتنا وأشواقنا الوردية
يا المنتهية فيك انّاتنا ووجعاتنا وهضاريب انتشا
أبقي عشرة علي قليبك .. أبقي زي ما قلت ليك
وكانت وكانت وياما كانت
كانت صدفة وأجمل صدفة في لقياها
كانت عمر مختصر في لحظة
كانت طفلة جميلة رقيقة وبكّاية
كانت دمعة بتنزل في أقرب فرصة
كانت حلم وكانت واقع
كانت حلم وصارت واقع
كانت شوق من تالاي شاهقة حواجزو
كانت
فرح
وكان ماكان وكان
كان الزول العاشق نفسو ..
أبدا أبدا حاشاهو
كان الزول العاشق ناسو وناسي وناسك
كان الزول اليوم البكره
كان الأجمل وكان الأقوي وكان الأطيب
في كلمتو في بسمتو في طبايعو وفي خصالو
في حشمتو
كان المحور في دائرة الحرمان
تهفو إليه قلوب الحيارى والعذارى
وكان الزاويه القائمة في مثلث الحياة
ترتكز عليه كل الضلوع
كان اسطورة
وحيظل
اسطورة
وكان ماكان وكان
كانت لمه فكانت صدفة
شيش ببشيش صارت صاحب
واجب الصحبة تقومبو زياده
واجب الخوه علي جيدا معلّق
واجب الإنسانية معاها ضليلا
كل الواجبات منها تخجل
كل الدمعات عليها تساسق
كل الإصرار عليها مدفّق
وياهو الحال الكان والكائن والحيكون
تثبت في وش الريح .. تعيش مستريح
وعقبال مانشوفك تسرح وتمرح في راحتك البلا حدود
وكان ماكان وكان
كان العشق المن طرفا واحد
كان الأول طرفا أبعد من إنّو ينال
كان البسمه الواحده ومافي مثيلا
كان الشمس العاشقه عيونو بتجبرو شان يظلل
كان الفريم يستحق المشاهدة مراة واتنين وتلاتين
كان الصدفة الجاتك لاعند بابك
بالصح الأكتر .. جاتك لاعند شاشتك
شفتها وشافا معاي الزول الواحد ومافي بديلو
الزول العاشق عطشي وعاشق نيلو
شفتها تاني وبدت القسمة معاى الناس
واحد عايز العشق سبيل والتاني حاسب العشق هواية
اما التالت قال مافرقت سبتها ليكم شان يتربع قلبها رابع
وفازبها نفس الملك الاسطوره
وكانت ليهو وكان اليوم ما أبيض .. ولاهو أسود
كان اليوم يبقالي رمادي
ما بين أبيض لونا وسواد لوني
كنت أتوه بينات ألوانّا .. ليالي
وكان الراي عند صاحبي الواحد وبس
شوف الشبهك وقدرك خلقه وأخلاق
شوف البلد الناسا عزاز .. شوف الخدره الناس لذاذ
وكان لابد من أسمع راي الصاحب الواحد
وفعلا كان
وكان ماكان والقصة تطووووووول
وكان الأمس القبل الأمس الفات
قلتلو تعرف ايه يعني خلايا العشق لا تموت ؟
قال لا
قلتلو تعرف ايه انت بالنسبه لهذا الكان ؟
قال لا
وكانت كارثة ووقعت بلا ميعاد
وكان ميلادو زيّ التقول أمس
مطره ورعد غربة وشجون
عطر وورق سلفان شنطه وسبت
وكان ماكان وكان
كانت اولي النهايات التي لا اذكر بدايتها
أتمني أن ألقاها فقط لأقول لها
شكرا
وكان ماكان وكان
كان زولا مسالم وجد أمير
كان زولا ولوف مأصّل وأصيل
كانت جلسة وكان الصمت محلّق فوقو
كان انطباع أول .. جميل
كان اليوم في نفس اليوم بايت بره
جيت من بره دخلت عليهو
وكان أول بدايه أتمني ما تنتهي
وكان ماكان وكان
وكان
ماكان

وكان